زوجى حبيبى !

هى تعرف طباعه جيدا .. على الاخص السيئ منها
تعرف جيدا عصبيته و عدم قدرته على السيطرة على اعصابه..
ابطال الروايات الرومانسية لا يتعصبون ابدا على حبيباتهم
لكن من قال انها تريده بطلا لرواية رومانسية ؟!! ..
هى تريده بطلها وحدها
لذا اذا لم يفقد سيطرته على اعصابه ويملأ الدنيا صراخا و ولم يلوح بيده فى الهواء بحماسة 

ولم يبدأ بالانفعال وصب اللوم عليها 

فلن تشعر ابدا انه بخير .. وستشعر ان شيئا مسه
ناهيك انه بعد دقائق معدودة سيأتى لها 

يلثم يدها و جبينها 

و يعتذر بأرق الالفاظ

سيأتى لها وحدها يرتمى فى احضانها

سيأتى لها بهدية من هداياه العبقرية

ربما يأتى لها بعقد من اصداف البحر 

يذهب الى الاسكندرية خصيصا ليأتى به

لا تستطيع ابدا توقع ما سيفعله

مجنون هو طفلها

كم يسعدها هذا 

كم يشعرها بالآمان

هى الانثى الوحيدة القادرة على فهمه .. هو طفلها الوحيد
تقول له مداعبة  " اذا لم تُجنّ سأعلم انك لست زوجى حبيبى "

هو بطل روايتها وحدها
هو بطلها الاوحد

ميدان فى قلبى

اخواتى نازلين الميدان
وانا فى ميدان فى قلبى
كل يوم بنزل و اغنى
واصلى

على شهدا ألوف
واطوف بكل ركن متحنى
بدم شهيد
وادور على بنوتة حلوة
تاهت منى
فى وسط الضرب
بنتى
ام العيون السود
تاهت فى عمر مكرم
و لقيتها فى محمد محمود
وحلفت ما تسبنى
وكل يوم انام و اصحى
اخواتى ينزلوا الميدان
وانا الميدان فى قلبى
كل يوم بنزل اغنى
واخد بنتى فى حضنى

مافيش دليل

اتعلمت احب عشانك
و الحب فى بلادنا مر
او مستحيل
مع ان دمى مبقع فستانك
بس اللى قتلى اصبح حر
ومافيش دليل

اغنية اطفال

الضيف التقيل قرر يرحل
حبيبتى هترجع تضحك تانى
الضيف التقيل كان خانق ضحكتها
هجيب لحبيبتى مصاصة
هنحتفل سوا
الضيف التقيل كان فاكر نفسه جميل
كان فاكرها بتحبه
الضيف التقيل مشى حزين
الضيف التقيل .. الضيف التقيل
فام فوم فى .. فام فوم فى

هييييييه

#من اغانى اطفال بلاد الشتاء الطويل

بعض اغانى الاطفال حقيقية ومرعبة اكثر من اللازم .. الا توافقنى الرأى؟

مرسال لقلبى

واقول ممكن بكرة يجى بحال
وابعتله سؤال ورا سؤال
عنَك و عن حتتنا
وافكرك بجنانا
واسلاكنا اللى بتلمّس
وعن بنوتة 

ضحكتها بتونّس
وتتوه مكاتيبى فى السكة
واستنى الرد واستنى
اكتبلى منَك جواب
واجرى بلهفة اقراه
واقعد على الدكة
والقى فى وشى السؤال
ارد عليك
انا ممكن انسى كل الخلق
الا انتَ

# مرسال لقلبى

تبا لى !!!

كيف تتعامل مع انثى ترى كل كلامك لها اهانة لمشاعرها ؟!
وانها رُغم كل شئ تتحملك 
لكن الأمر يخرج عن سيطرتها دوما 
لذلك يفيض بها الكيل دائما فى وجهك 
لماذا ؟!!
لأنها تتحمل الكثير 
اكثر مما ينبغى 
و تشعر دائما انها تستحق الأفضل 
لكن " حظها الهباب " أوقعها فيمن لا يُقدر 

هى تشعر على الدوام انها ام لك
لذا .. انت ككل الأولاد .. سيئ ولا تعرف مصلحتك
وهل يعرف الرجال مصلحتهم ؟!!
"قطيعة"
انهم ليسوا سوى اطفال حمقى

هى دائما بداخلها شيئ لا تستطيع ان تعرف كنهه
ولن تسمح لك هى ان تعرفه
هو سلاحها السرى الدائم
اذا ما سولت لك نفسك ان تعتقد انك على صواب
"انت اصلا ما تعرفش حاجة !"
طب اتكلمى
تنظر اليك بعينين مغرورقتين بالدموع
"مهما قلت مش هتفهم "

ولكنها رغم كل شيئ تتحملك
لا تستطيع ان تنكر ذلك
لماذا تتحملك ؟!!
لأنها امك و " متنيلة على عينها " بتحبك
هل هناك احد يكره " ضناه "
مهما كان متعبا ؟!

"آيدالك صوابعها العشرة شمع " ماذا تفعل اكثر من ذلك

تباً لى .. لماذا اذا تركتها !

جت سليمة

ما بعرفش ارسم
لكن بحاول ....
لإنى بحب الرسم
كويس انها جت فى الرسم
مش فى الطيران :)

خط النهاية

راجل عجوز و مراته من تركيا شكلهم ما يتوصفش
الشعر الابيض اللى شاب من طول الرحلة
و خبرات و ايام الدنيا اللى حفرت تجاعيدها على وشوشهم
وحب الدنيا فى نظراتهم
شوفته وهو بيزقها على كرسى متحرك
وهى بتعيط عشان اخيرا شافت الكعبة

اخيرا وصلوا سوا
بيمسح دموعها بإيده
و بيبتدوا الطواف

ربنا يحفظهم و يحميهم

# مشاهد من الحرم :)

شخبطة !!

- خرجت من باب البيت وتركت احلام الطفولة ورائى ومشيتُ لأبدأ احلام الشباب
ويوما ما سأترك احلام الشباب لأحلام النضج و احلام النضج لأحلام الشيخوخة

مُخطئ من يتصور ان هناك احلام الطفولة و احلام الشيخوخة 
من فَرطَ فى اول حلم لن يتبقى له شئ 

خذ من طفولتك لشبابك و من شبابك لشيخوختك ......

- لا تترك ابدا جرحا دون تنظيف

مهما استغرق من الوقت 
فقد يؤدى جرح فى اليد الى الغرغرينا 
وما يسرى على اليد يسرى على القلب ...

- ماهو طعم السم ؟
لا اعتقد انى اعرف 
لم ينج اى شخص تذوقه كى يحكى لنا

تلك من نوعية الاسئلة التى تحتاج لشبح كى يرد عليها 

تماما كسؤالها لك " هل سنظل معا للأبد ؟ "

- بدون اى فذلكة ... تقدر فعلا تعمل اى اى حاجة لو وثقت فى نفسك انك تقدر ..
#الثقة

- الناس و هى صغيرة عادى ممكن تلعب فى الطين و هى مستمتعة جدا ولما بتكبر بيجيلها العصبى لو فى نقطة طين وقعت عليهم

واحنا صغيرين كنا بنشوف الحلو فى كل حاجة حتى فى الطين
ولما بنكبر بقينا بنشوف الطين فى كل حاجة حتى الحلو

طوبى لمن ظل طفلا بعد الخمسين :)

- فى اى رحلة اختار الصديق اللى ما يخذلكش ابدا
لكن فى رحلة عمرك اختار اللى ما تخذلهاش ابدا
الاولى ندم ساعة .. و التانية ندم كل ساعة

I'm not perfect .. And i don't want to be perfect

I just need to be perfectly me

- لحظات السعادة رائعة اذا استثنينا منها سنين الوحدة .... 

- هو انا ليه ما بيتسدش نفسى زى الناس الطبيعية لما بحزن او بتضايق
ليه بتركبنى فاجعة
ببقى مستعد اصرف اخر قرش معايا على الاكل
هو حزن و خراب ديار ؟ :D

لازم يكونوا اخترعوا حاجة بتزغزغ هتوفر كتير و الله :D

فيها ايه يعنى لو كنت مسمى المنبه اللى بيصحينى للشغل صباح الخير ؟
بحب كل يوم اول ما اصحى ابتسم
عشان بلاقى نفسى بتصبح عليا
عالاقل حاجة تصبح عليا ^_^

و عادى برضه انى اكون غلطت فى اول مرة اظبطه
و سميته صلاح الخير بدل صباح الخير .....

و بعدين قررت انى اسبها كده
عشان اصحى كل يوم مبسوط لانى بلاقى نفسى بتصبح عليا

و بضحك عشان بكتشف كل يوم
ان نفسى لسه عيله صغيرة زى ما هى :)

اللهم دمها نعمة ... آميين :)

ما عدتش جبان

طول عمرى جبان
عشان كده
انا دايما آخر واحد يقول سلام
لأى حد و أى حاجة
ومن فرط السذاجة
بفتكر نفسى كده بشترى
اقولك
أنا اللى عامل مفترى
بس فى الأصل غلبان
وبقول على نفسى فكيك
وركبى بتخبط و اتلخم
لما اشوف بنت الجيران
لما كنت صغير
كنت فاكر اللبان السحرى فعلا سحرى
زيه زى اميجو اللى بينور
وان فى قرون بتطلع
للى بيلعب ف الطين
وان اللى بيقعدوا آخر صف ف السيما
بلبس المدرسة
و ايديهم متشبكة
دول متجوزين
و ان كل اللى بيعمل غلط
كان قصده خير
و قيس على كده كتير
كلها حاجات صدقتها

زى النهاردة من سنة
كنت بعزى فى برائتى
اول حاجة ودعتها
قبل ما تودعنى
ومن ساعتها
وانا اول حد يقول سلام
لأى حد و أى حاجة
وما عدتش جبان

سأكون يوما ما اريد

انى اومن فى الحرية ولا شئ سواها
و ابذل فى سبيلها حياتى
تظل انتَ انتْ حتى تفقد حريتك
فاذا فقدتها فقدت كل ما يميزك
و كل ما يحتفظ لك بكينونتك
لكنك تظل حيا 
تتنفس و تأكل و تقوم بجميع التصرفات الروتينية اليومية
تظل هكذا حتى تستسلم 
فإن استسلمت فأنت الآن فى عداد الاموات
و على من حولك مراعاة ذلك

جميعنا نتعرض لفترة من الزمان يتفق الكون فيها على محاولة سلبك حريتك
فإذا صمدت ساعة 
تآمر الكون كله على تحقيق ما تريد
أنت أنتَ ما تريد
سأكون يوما ما اريد

الجريمة الكاملة

لم تسمع صوتها اليوم على غير العادة 
تتمتم بين و بين نفسك لعلها مشغولة ربما العمل كثير اليوم
تترك لها رسالة نصية كى تتصل بك
تضع كل شئ جانبا و تنغمس فى عملك
فجأة و بدون مقدمات تشعر بالخوف الشديد عليها 
تحاول أن تتجاهل تلك البذرة التى بدأت تنمو فلا تستطيع
حتى تصبح كشجرة الكافور الضخمة فتهرع للاتصال و الاطمئنان عليها 
لاتستطيع التقاط انفاسك من فرط انفعالك
تنتظر انتهاء الجرس .. تمر الثوانى عليك دهور 
لماذا لا تجيب انها ابدا لا تتركنى انتظر
اخيرا تجيب .. بصعوبة تمنع لسانك و تغالب مشاعرك 
" انتى كويسة ؟؟ "
فتجيبك باستنكار
 " آه كويسة انت خايف كده ليه " ؟؟!!
لا تعرف بماذا تجيبها 
فتشعر بسخافتك
"لأ مافيش حسيت بس احساس سخيف اهم حاجة انك بخير"
"طبعا بخير هو فى حاجة انا عملتها تدل على انى مش كده ؟؟!"
تشعر بنفسك تتضائل حتى تصبح مثل رأس الدبوس 
"لأ ما فيش هو انا حسيت كده مرة واحدة ما تحطيش فى بالك .. سلام "
"سلام "
احيانا تكره قلبك لأنه سبب المأساه 
لأنه الوحيد الذى يصنع الجريمة الكاملة

مهد الميلاد 2

اقف متأملا احضان البحر الهادر

اتأمل فيه حضن الانثى بحنوه و تقلباته المجنونة

و احتوائه لانفاسى 

ارى فى موجه الذى يلطمنى نظراتها السابرة

تبتسم الشمس الغاربة الى وتلوح بيدها 

ارد التحية بأحر منها

اراقب تهاديها فى معطف البحر الغامض

يعزف نزولها

"وحياة سواد عينيك يا حبيبى غيرك مايحلالى"

ينتفض قلبى انتفاضته الاخيرة

افتح ذراعى للبحر و اتمنى ان يقبَلنى

من بين ذراعى البحر خرجت

عَلِّى بين ذراعى البحر

اعود من حيث اتيت

http://www.youtube.com/watch?v=qaeYbwJOalI

مهد الميلاد 1

مللت الكلام و كفرت به
مللت ما افعله حين احزن
مللت مالا افعله حين احزن
لم يعد يجدى اى شئ
لم يعد يخرجنى من الدائرة
لم يعد يكسر سوار الالم
نسى قلبى النسيان
فقط يتذكر كم عانيت
اغمض عينى واتمنى ذراعى انثى
مهد الميلاد
 من بين ذراعى انثى خرجت
 عَلِّى بين ذراعى انثى
 اعود من حيث اتيت

موت عميق

صحيت من النوم مالقتش رسالتك 

قلت الصبح لسه ماجاش 

(ن)مت تانى

وجه القمر - بين رفعت وماجى

- يحبها حبا شديدا ملك عليه جوامع نفسه ، فهو يقول أنه يحمل نحوها خليطاً من مشاعر العاشق المتيم ، والطفل نحو أمه ، والتلميذ نحو معلمته ، ووشق الأستبس نحو الأستبس ذاته !!

- يشعر بأن حبهما كان موجوداً منذ الأزل .. ربما بينما المصريون القدماء ينحتون مسلاتهم .. ربما بينما القمر يولد من المحيط الهادئ .. إنه الحب الذى لا ينتظر حتى نسميه حباً لأنه هنالك دائماً ..

- يشعر أنها هى المبرر الوحيد لحياته .. لو حدث لها شىء فقد انتهى .. لا يوجد سبب للاستيقاظ من النوم صباحاً ، ولا لرؤية شمس جديدة ، فهو يعتبرها القيمة الهامة الوحيدة فى حياته كلها .. 

- يشعر أن حبه لها قد جعله عاجزاً تماماً عن ممارسة حياة طبيعية .. جعله ذئباً متوحداً يحيا هنا فى مصر ، بينما قلبه ينبض هناك فى ( إنفرنسشاير ) .. صورتها تطارده كلما بدأ مشروع زواج أو خطبة .. كان يحاول أن يتحرر من إسارها لكنها كانت تملك كل حواسه وأفكاره .. عندها كان كل شىء يتحطم ..

- يعتقد أنها هى سبب سخريته اللاذعة وشدة ملله ، لأنه لا يجد ذكائها وتجددها فى الكون من حوله ..

- يشعر بأنها تعرف كل شىء عنه .. ربما أكثر منه ..

- يراها رقيقة جداً .. هشة جداً ، حتى أنها تمشى على العشب دون أن تثنى منه عوداً واحداً ! وحتى يخاف أن يهشم يدها البلورية وهو يصافحها !

- يرى عيناها الزرقاوان صريحتان بريئتان إلى حد إشعارك أنك شيطان !!

- كلما فارقها فترة ثم لاقاها يشعر أنه يبدأ علاقته بها من جديد ..

- هى الشخص الوحيد فى الكون الذى يعرف جيداً أنه يحب وجوده ويستمتع به ..

- يثير جنونه التفكير فى كل الساعات التى تعيشها بعيداً عنه .. كل الأفكار الذكية والدعابات والرقة التى تشعها من حولها بينما هو وحيد فى شقته الكئيبة .. يمضه ذلك الشعور المزمن بأنها ستنفد !! كأن مخزونها من النضارة والرقة سينتهى بهذه الطريقة .. لن يبقى منها شىء لأن مصير الشموس كلها الخمود .. لو استطاع لاستولى على ماضيها وحاضرها وغدها بوضع اليد .. كل الأعوام التى فاتته وهى طفلة ، وكل الأعوام التى ستفوته حين يختفى فى القبر !

- كثيراً ما يصغى إليها أكثر من اللازم حين تتكلم ، فتتزاحم خواطره حولها إلى الحد الذى لا يعد يستوعب معه حرفاً مما تقول !

- يشعر بأنها مهما تقدمت فى السن ستظل مجرد طفلة رائعة الجمال ؛ فهى لا تحتاج إلى مجهود كى تفكر وتضحك وتحلم كالأطفال ..

- يشعر بأنها لا تشيخ أو تفقد نضارتها أبداً بل العكس .. يشعر بأن الأعوام تلتف حولها لتحميها .. لتزيل الغبار المتراكم ، فتبدو دائماً كأنما خلقت لفورها .. 

- يرى أن أجمل ما فى علاقتهما هو أنهما متباعدان ومن عالمين مختلفين ، فمهما امتد الزمن يعرف كل منهما أن الآخر يحبه حقاً .. يحترمه حقاً .. يقبل الموت من أجله حقاً ..

.ومع كل هذا فهو لا يجرؤ على الزواج منها لأن :

- لأن كل منهما يريد أن يبقى الآخر على مسافة منه كى يظل رمزاً عزيزاً أبدياً دون عيوب .. حين يتحول الآخر إلى معنى .. كوجه القمر الذى نراه من بعيد جميلاً ، لكن لو اقتربنا منه سنرى الحفر والفوهات القبيحة ..

- لأن كل منهما (ماجى ، رفعت) لا يريد التخلى عن حياته وبلده ، فهو لا يريد ترك مصر ، وهى لا تريد ترك اسكتلندا ..

- لأنها صارت بالنسبة له مصدراً لغوياً أو معنى مطلقاً .. هل تزوج أحد (العدالة) أو (الحقيقة)من قبل؟

- لأن زواجهما يعنى المخاطرة بصلتهما الروحية الرائعة التى قد تتحول بعد الزواج إلى لعنات متبادلة ! 

التدوينة دى تجميع لكلام رفعت عن ماجى فى سلسلة ما وراء الطبيعة للدكتور أحمد خالد توفيق  :)

ومضة 2

ماشى فى شوارع وسط البلد
عينيه فيها الدموع
والسماعات فى ودنه
يبص للسما
ويبص تانى ع الحيطان
يلقى صورته بتبتسم
وصوت محمد محسن
بيدندن
عمر الغنا ما بينتهى
بنموت ويفضل حى

غصب عنه يبتسم :)

ومضة 1

واقف قدام الفاترينة 
لازق وشه فى القزاز
بيلحس بولة الآيس كريم 
وقدامه القميص اللبنى اللى عمره ما هيقدر يشتريه

خاف !

مرة واحد راح يشجع مات .. ماسكتش
مرة واحد راح يهتف مات .. ماسكتش
مرة واحد فهم مات .. ماسكتش
قالوا سقط النظام
بس ما سقطشى
قالوا اصبروا
ليل الظلم يفوت
مات الولد و بعده ولد
وبعده بنات بنوت
يا عسكرى خاف من ناس ما بتخافشى
فاكرين الموت سكات
وما يعرفوش ان السكات هو اللى موت !

وجهى العملة

محبوبتان

هما اثنتان لكن واحدة

يعتليان عرش قلبى من قديم الأزل

ربما قبل الميلاد و قبل الحب وقبل كل قبل

قبل السماء و قبل النهر و ازهار الجبل

تغار كل منهما من الأخرى

ويتنازعان الحكم فى قلبى

كيدان لجسد واحد

كعاصمة للمملكة الخالدة

لا يكفان عن الشكوى

و لا أكف عن عشقهما

واقنع كل منهما بانى احبها اكثر من الأخرى

و اقسم صادقا

ان عشقى لأى أخرى

هو سراب ولى فى العصور الغابرة

واضحك فى سرى

يالنون النسوة

الا يعلمان انهما وجهان لعملة واحدة

بهما احيا وبهما ترتسم البسمة على وجهى

و بحبهما امتلك ناصية الشمس

و اروض الجبال و اسود الحضر و البادية

خلقكما ربى من طمى النيل لى سكنا

بلادى اللتى تسكن بين اضلعى

و حبيبتى اللتى اسكن بين اضلعها

دامت محبتكما لانهار قلبى راوية

زهرة برية

هى الوحيدة التى تستطيع فعلها لكنها لا تعلم

هى الوحيدة اللتى تمتلك مفاتيحك لكنها لا تهتم

هى الوحيدة التى تستطيع ان تنساك و هى تذكرك و تذكرك و هى ناسية

تعلم ان وجودها يعنى الحياة كما تعنى الشمس و الماء الحياة الى الأرض القاسية

لكنها تضجر

فتبتعد و تعود

تعطيك ما يبلل ريقك لكن لا يروى ظمأك

تعنى لها الروح لكن فى حياتها ما هو اهم من الروح

و تعنى لك الحياة و ليس فى روحك ما هو اغلى من حياتها

هى عيبها الخوف و الملل

هى زهرة برية نبتت فى صخر الجبال و تعلمت ان تحمى نفسها

فاما احتضنتها

واما سقطت من قمة الجبل

بذرة أمل

كل صباح و انتى لى وطن
يا محلا الوطن اللى تلاقيه حاضنك
صباح ضامك
صباحك حب مروى بشجن
صباح الفل يا ست الكل
يا امى و حبيبتى
وبعد الثورة بنتى
صباحك كرامة ما تعرف ذل
صباحك غنوة بقالها سنة
صباحك ثورة مكمله
صباحك بذرة أمل
بذرها شهيد
صباحك جديد
صباحك ياسمين
النهاردة الوقفة
وبكرة خمسة وعشرين
صباحك حرية
بكرة للميدان راجعين
وحشتينى

ذكريات محمد محمود

- جيهان وقعت جمبى من تأثير الغاز السام اللى اتضرب فى وسط الميدان وقعت وما قدرتش اعملها حاجة لإنى تقريبا كنت فى غيبوبة اقسم بالله ما هيكفينى عمركم كله فى اللى حصلها ده .. اقسم بالله ما هسيبكم ولو دى آخر حاجة اعملها فى حياتى

- أول امبارح فى محمد محمود دخلت انا و محمد علي الشارع بالليل فى طلعة جديدة وبعد ما وصلنا لنص الشارع تقريبا نفاجئ بأكتر من 10 نقط ليزر علينا و على الدايرة المحيطة بينا

اكتر من 10 قناصة بيصوبوا علينا وبينا و بين وزارة الداخلية مسافة كبيرة جدا
لسه مش مقتنع انها حملات ابادة ؟؟

- فى وسط الكر و الفر المستمر فى شارع محمد محمود اضطرينا تحت ضرب الغاز المكثف نتراجع لأول شارع محمد محمود بعد ستارة دخان اتعملت علينا .. جمبى شاب فى اواخر العشرينات او اوائل التلاتينات طويل و ماشاء الله صالب عوده بدقن خفيفة .. وقعت قنبلة غاز جديدة قدامنا بالظبط بأسرع ما يمكن لقيته بيمسكها بإيده من غير جوانتى و لا فوطة و بيخترق الغاز زى السهم عشان يرمى القنبلة من جديد على الأمن
المركزى وسط هتافاتنا الله أكبر راااااجل بطل راااجل

-زميلتنا هدى دكتورة فى المستشفى الميدانى وصلها شاب فى حالة سيئة جدا ابتدت تسعفه بسرعه لقيته بيقولها وهو بيموت انا كده كده رايح سيبيني والحقي حد عنده فرصه اهم بدل ماتضيعي وقتك معايا و استشهد على ايديها

دكتوره هدى واقفه في المستشفي بتحارب عشان تحافظ علي حياه

المصابين وبتعيط علي اللي مابتلحقش حياته وتكمل شغلها

ولما اترمت جنب رجلنا جوه المستشفي قنبله غاز جرينا كلنا علي بره ولقيتها راجعه قبل ماتاخد نفسها وتقولي مش هاطلع من غير
المصاب اللي كنت باعالجه

- المستشفى الميدانى اللى ورا هارديز واخد نصيب الأسد من عدد مرات الضرب .. اتضرب 3 مرات وكل مرة كنا بننقل المستشفى عند مسجد عمر مكرم او عند المجمع و يرجع الاطباء يرجعوها تانى اخر مرة المستشفى اتضربت بالغاز و الدكاترة كلهم وقعوا من الضرب لما جينا ننقلها لقينا الدكاترة بيقفوا فى وشنا و بيمنعونا من اننا ننقلها و بيقولوا ان ده اقرب مكان من الضرب فهيخليهم يقدروا ينقذوا عدد اكبر من المصابين اللى ممكن يموتوا لو استنينا لما يروحوا عند المجمع قلنالهم بس انتوا كده ممكن تموتوا قالوا نموت مش مهم بس نكون انقذنا اكبر عدد من المصابين ولحد دلوقتى المستشفى قايمة بعملها رغم ضربها كل شوية

- اول شارع محمد محمود و نص الشارع عند الخرابة فرق الالتراس عاملين كماين المولوتوف عشان يمنعوا اى تقدم لقوات الداخلية و بالليل بيبعتوا لبعض اشارات بالليزر و الكشافات

- اول امبارح الضرب كان كثيف جداا علينا فاضطرينا نرجع لورا عشان نكتشف ان الضرب شد عشان يستفردوا بالكمين اللى عند الخرابة فى وسط الشارع كلنا جرينا لقدام عشان نلحقهم لقينهم فى مكان مكشوف جدا و بيواجهوا الرصاص بطريقة مباشرة ولقيناهم رجعوا الداخلية لأكتر من 100 متر لورا لوحدهم بالطوب و بس

يكفى انى اقول لكم ان عدد الشباب اللى كانوا عند الخرابة ساعتها اقل من 20 شاب معاهم طوب و قزازتين مولوتوف رجعوا اكتر من 50 عسكرى مسلحين ببنادق الخرطوش و الغاز و المطاطى و الرصاص الحى


-من اجمل المواقف انك تقابل واحد صاحبك واحشك بقالك كتير ما شوفتوش و انت بتعالجه من اثار الغاز فى شارع محمد محمود او و هو بيمدلك ايده بيقومك لما وقعت .. يااااااااااه بتحس بجد قد ايه الدنيا حلوة و قد ايه ربنا كريم و رحيم بينا

- تيجى تشيل طوبة عشان ترميها على العساكر اللى بيضربوك بكل انواع الاسلحة تلاقى واحد بيقولك سيب الطوبة دى و خد طوبة اصغر شوية دى تقتل و احنا مش زيهم

- واحد من الثوار فى وسط ثورة غضبه يشتم العساكر تلاقى حد تانى بيقوله بدل ما تشتم قول يااارب
... الشتيمه مش هتنصرنا لكن ربنا هينصرنا

- العساكر تنسحب لبعد وزارة الداخلية عشان الثوار يحرقوها و تلبس التهمة فيهم الشباب الرجالة الواعى و اللى فاهم قضيته يوصل لوزارة الداخلية و يعمل كردون حواليها عشان ما حدش يتعرضلها

- الغاز يتضرب و الخرطوش على الناس فبحكم الغريزة مجموعة ناس ترجع جرى عشان يلاقوا بقية الناس و اغلبهم من البنات اللى بيسعفوا الثوار بيهتفوا
اثبت .. اثبت .. اثبت فيرجعوا تانى

- اغلب الثوار خايفين من اهلهم اكتر من خوفهم من المدرعات و الرصاص الحى

- شباب الالتراس بدل ما يغنى جمهوره ده حماه او من التالته شمال تلاقيه بيغنى قلناها زمان للمستبد الحرية جاية لابد

- ممكن تلاقى اللى جمبك ازهرى و اللى جمبك الناحية التانية مسيحى و قدامك واحد بدقن و وراك بنوته و حواليك ولاد و بنات بلبس المدرسة و شباب التراس متحمس و راجل عجوز و أم .. كل سلاحهم فى الدنيا حبهم لبلدهم



‎- بنوتة عندها 19 سنة طول الوقت جمبنا فى الصفوف الامامية كانت بتحط حاجة على راسها ووشها علشان الناس تفتكرها ولد و يسيبوها ما بتعرفش ترمى طوب لكن عندها روح تهد جبال
على رأى اللى قال تسريحة الشعر ضفيرة فى آخرها لغم فى عينيها ذخيرة و حيرة بتهد الكون
خاضت معايا انا و عمرو أبوالنجا موقف جامد فى وسط الضرب كنا بنط فوق قنابل الغاز زى سوبر ماريو
وسمينا الجروب بتاعنا على اسم سوبر ماريو

و اتصورت لها صورة اسطورية فى وسط الضرب
البنت اللى ليا الفخر انى اعرفها .. شروق مجدى :)

- بينا و بين العساكر تقريبا 50 متر و العسكرى يسحب بندقية الخرطوش و ينشن علينا فى لحظة واحدة تلاقى المجموعة كلها بتناغم غير مسبوق بتنزل بتوطى و تدى ضهرها للضرب عشان تحمى عينيها و هم قريبين من الارض بيكون كل واحد اخد طوبة تسمع صوت الخرطوش بيطير حواليك فى كل حته و بيخبط فيك فى بعض الأحيان و يخبط فى الشجر من حواليك و مرة واحدة المجموعة تقوم عشان ترمى الطوب و تطلع تجرى لورا عشان قنبلة الغاز اتضربت فرق الخل و السائل اللى بيغسل العين تشتغل و تعالج الناس و واحد يطلع يجرى على القنبلة و يرجعها للعساكر تانى مصحوبة بهتافتنا واحد يطلع من ورا يلا يا رجالة الله اكبر نجرى كلنا اتجاه العساكر و معانا الطوب نرميه عليهم يضربوا غاز نرجع يحاولوا يتقدموا و المدرعات قدامهم فرقة المولوتوف اللى عند الخرابة تضرب اتنين ناحيتهم يضطروا يرجعوا لورا نكون لقطنا نفسنا نقوم نهجم يضربوا .......


لا دى مش الانتفاضة الفلسطينية دى انتفاضة الحرية دى الثورة المصرية الثانية بث حى و مباشر من شارع محمد محمود

Game Over

حاجة حلوة جدا انك تفلتر الفريندز بتوعك
ويبقى الوول بتاعك عامل زى ميدان التحرير بالظبط
جميل ونقى
وتقدر تتنفس فيه
وبتقابل فيه عيلتك و انقى ناس عرفتها .. الناس اللى انت بتحبها وبس :))

بس فى مشكلة صغيرة
كل بوستاتهم سياسة سياسة سياسة سياسة و بعدين ... سياسة
حتى لما يحبوا يضحكوا يجيبوا الفراعين
سياسة برضه :(
و الأطفال اللى زى حالاتى متمردين دايما و بيتعبوا من الملل و الروتين
عشان كده هلعب لعبة
وكلكوا هتلعبوا معايا بالاجبار
بس مشكلة اللعبة دى فى حاجة واحدة
انك لازم ما ترمى خوفك قبل ما تلعبها

اللعبة بكل بساطه
هنتخيل ان كلنا فى اسانسير و الاسانسير اتعلق بينا
عشان الناس اللى عندها فوبيا او اللى مايعرفوش يعيشوا من غير سياسة :S
تخيل نفسك مستخبى اثناء الثورة والموت بيحاوطنا من كل حته و اتزنقنا كلنا
ولازم نفضل مكانا لحد ما ربنا يفرجها
كلنا بنبص فى عينين بعض
مش عارفين هنخرج من الموقف ده ولا لأ
يا ترى هنموت ؟؟
ولا هنخرج من هنا و نقعد نضحك على مناظرنا اللى شايفنها دلوقتى ؟؟

سألت سؤال

واحد هيقولى اشمعنى انت اللى بتسأل
هقولوا عشان انا اللى بحكى و من حكى اختار دور البطولة و بعدين انا ديكتاتور
لو مش عاجبك عندك التحرير

قولت : عارفين تخيلوا اننا موتنا دلوقتى
حياتنا وقفت عند اللحظة دى
فكروا كده ثوانى فى الحاجات اللى كان نفسنا نعملها و مش هنقدر دلوقتى نعملها ابدا
فكروا فى الحاجات اللى كنا هنموت و نعملها لكن ما عملنهاش بسبب الخوف

خوف من الناس هتقول عليا ايه
خوف لمجرد اننا معندناش الجرأة الكافية
خوف من جرح كرامتنا
خوف من ألف حاجة و حاجة و لحظات حلوة ضاعت علينا
وحاجات ما عملنهاش وقلنا هنعملها يكرة
وكلام ما قولنهوش وقلنا هنقوله بكره
وناس قولنا هنلحق نحضنها وملحقناش
وناس اشترتنا وبسبب خوفنا بعناها بلاش
وناس حبتنا .. بس احنا مانستهلهاش
وآخرة جاية و جنة .. ممكن مانخشهاش
و افعال كان ممكن تغير مجرى حياتنا كله 180 درجة من الحزن و الرتابة للسعادة
او على الاقل هنكون بنعمل حاجة بنحبها
كل ده وقف النهاردة .. زى ماتكون بتلعب سوبر ماريو و مرة واحدة موت ومالقتش عندك ارواح تانية
Game Over

حس بفداحة الموقف
بطل قراية
وفكر ثوانى كده فى كل اللى فاتك


صعب قوى مش كده ؟؟


طب يا سيدى السؤال بيقول
لو ربنا قدر انك تخرج من الاسانسير
مولود جديد بحياة جديدة
وفرصة جديدة انك تعمل كل اللى ما قدرتش تعمله قبل ما تدخل الاسانسير
غمض عينيك
وخد نفس عميييييق
وقول اول قرار هتاخده ؟؟
قوله تانى
قوله تالت
زعق وقوله رابع 
صرخ وقوله خامس
اكتبه هنا

لازم تكتبه طلعه من جواك و انسى خوفك
ماحدش ليه عندك حاجة
دى حياتك انت
و مش هتعشها عشرين مرة
هى مرة واحدة بس
و اكيد مش هتعّيش روحك الواحدة حياتك الواحدة وهى حزينة
الحياة اقصر بكتير من انك تضيعها فى تردد
و اغلى بكتير من انك تعيشها حزين

اكتب واعمل تاج لأى حد عاوزه يخوض التجربة :)
وبعد اذنكوا ماحدش يعلق على قرار حد
اكتب قرارك وبس :)

جوايا

جوايا

حزن ولا ألف عام

وليل طويل

وبرد

و دفا

نسى العنوان

جوايا أمل

من غير أمل انه يعيش

جوايا مفيش

فراغ سبتيه

لما قررتى تهجريه

لما قررتى جوايا ما تعشيش

جوايا حد زعلان

من انى زعلان

من حد جوايا

وجوايا حد ولا يهمه زعلى

يبكى

و ابكى

ولا يهمه بكايا

جوايا فرحة برجوع الشتا

ما كملتش

وحدوته حلوة ما اتحكتش

وبنوته عسولة

كانت بنتى و ما بقتش

ووش

بلبسه قدامك

عشان ما تشوفيش دمعة نازلة

اصعب عليكى

تقولى وحشتنى

بس عشان مزعلش

جوايا وعد وعدتيه و خلفتيه

وخوف من بكرة ليجى و انتى مش فيه

جوايا غنوة لفيروز لسه بترن

حبو بعضن

تركو بعضن

و فارس جريح لسه بيأن

جوايا غضب لانى ما استهلش منك كده

وقسوة على قلبى

لانه حبك كده

جوايا حلم ضايع مش لاقيه

وارادة تهد جبال

بس تهدها ليه ؟؟

جوايا كورنيش استانلى

و مطر

وذكريات اسكندرية

و خوف و غيرة

جوايا حجر

فتتيه بإيديكى

وسبتيه يطير

مش كان احسن تسيبيه حجر ؟؟

جوايا ضحك بالساعات

من ضحكتك و قفشة حلوة

قلتيها ببرائة

جوايا جراءه

جوايا كره لنفسى

لانى غبى

ما قتلتش ليه قلبى يوم ما جتلى الفرصة ؟؟

جوايا قسوة

وحنية بس مش ليا

وزعل و لسعان وجنون

وشال فلسطينى

ادتهولك هدية

تحطيه على كتفك فى الشتا

يدفينى

جوايا جبن

وحضن

كان نفسى يحضنى

مرة واحدة قبل ما اموت

جوايا قلق

انى عمرى ما احضنه

جوايا انتى

رغم انك بعدتى

و اقول ازاى بعدت

وقلبى لسه بتسكنه

جوايا عشق و زعل

جوايا واد جدع

مات قبل ما يتولد

جوايا نفس دخل و حلف مايطلع

ولما شافك طلع

و توهنا فى السكة 

ولا عمره رجع

الاغلبية الصامتة

- الأغلبية الصامتة لا تفرحوا كون اسمكم اغلبية

وان تطع اكثر من فى الأرض يضلوك عن سبيل الله 


ولكن اكثرهم لا يعلمون


ولكن اكثر الناس لا يؤمنون


كم من فئة قليلة غلبت فئة كثيرة بإذن الله و الله مع الصابرين 


وفرعون قال على من آمن مع سيدنا موسى
ان هؤلاء لشرذمة قليلون
ويوم حنين اذ اعجبتكم كثرتكم فلم تغن عنكم من الله شيئا و ضاقت عليكم الأرض بما رحبت
الرسول صلى الله عليه وسلم لما تحدث عن الكثرة قال انتم يومئذ كثير لكن غثاء كغثاء السيل
وقال الامام على : لا تستوحشوا طريق الحق لقلة سالكيه 


عمر ما كان عددنا هو مصدر قوتنا ايمانا هو مصدره
افتكر ده دايما 
فإن يكن منكم مائة صابرة يغلبوا مائتين وإن يكن منكم ألف يغلبواألفين بإذن الله و الله مع الصابرين


اثبت على الحق و لو كنت وحدك

وحدى لكن ونسان

لم كل احلامه و احزانه و امله فى بكره الجى ...

وضحكة بنوته حلوة بتنور قلبه

وورده حمرا رغم الزمن ما دبلتش

لمهم كلهم فى ايديه الاتنين وتبت عليهم قوى و خباهم فى جيوبه

حط الشال على كتفه 

اخد نفس عميييييق وساب الشال يتنفس

حضن نفسه قوى وحس بالدفا بيملا قلبه

بص لأخر نقطه فى الطريق و ابتسم

فى وسط زحمة بشر و عربيات و ذكريات ماشى طريقه بيبتسم و صوت منير بيتردد فى عقله

وحدى لكن ونسان وماشى كده